Плач Пресвятой Богородицы (Стояше Днесь При Кресте)

ПЛАЧ ПРЕСВЯТОЙ БОГОРОДИЦЫ

Стояше днесь при Кресте, Пречистая Девая,
Умиленный плач сподвизаше, сладчайший глас испущаше.
О Свете Пресветлый, Заре присносущная,
Где твоя зайде красота, светолучная невечерняя,
Добровидный Сыне Мой, Сладчайшая Доброта,
Где Твой вожделенный лица зрак, Краснейший Свете Мой.
О Божия Мудросте, Церковная Сладосте,
Что се вижу зде, преславное видение ужасное.
О Свете Великий, Сладчайший Исусе,
Где Твоя доброта сокрыся, возлюбленне Сыне Мой.
Увы Мне, Свете мой, дражайшая Доброта,
Како не узрю, Христе Царю, на Кресте Тя распинаема.
О солнце пресветлое, сокрый ныне лучи своя,
Виде своего Создателя, неправедно зде ныне страждуща.
Иосифе преблаженне, сойми тело Исусово,
Положи во гробе нове, изсеченне из камене.
Где Твой зрак пресладкий, Сладчайшая Доброта,
Како погребу, Тя Сыне Мой, Безсмертнаго и Предвечнаго.
Не рыдай Мене, Моя Мати, восстану бо из гроба,
Тебе вознесу со славою, превыше всех горних и земных.
Воскресни, Боже, Сыне Мой, тридневно от гроба,
Взыди ко Отцу на небеса, судяй концем всей земли.
Тогда Тебе всяка тварь, небесных и земных,
Поклонится и прославит, Царя веком и Зиждителя.